Plantun de Prouvènço

Pèr coumpara dos planto d'encò nostre

Rhamnus alaternus & Plumbago europaea

Daladèr

Rhamnus alaternus

Rhamnaceae

Àutri noum : Aladèr, Fielagno, Daradèu, Taradèu, Aigo-espouncho.

Noms en français : Alaterne, Nerprun alaterne.

Descripcioun :
Aubret en bouissoun de 1 à 3 m d'auturo, pas toujour bèn couneigu e pamens que se vèi proun dins la garrigo e li relarg de l'éuse e dóu roure. Se destrìo de si cousin li Phillyrea e majamen lou media, à si fueio que lou bord laisso passa lou lume (fotò). De regarda peréu li costo. Fai, au mes de mars, de pichòti flour verdo.

Usanço :
Li fru rouge, pièi negre dóu daladèr soun empouisounant. Servié, à passa tèms, pèr faire uno tenchuro jauno. La rusco es astringènto e purgativo.

Port : Aubret
Taio : Pancaro entresigna
Fueio : alterno
Tipe bioulougico : Faneroufite
Cicle bioulougico : Planto renadivo

Gènre : Rhamnus
Famiho : Rhamnaceae

Coulour de la flour : Verdo
Petalo : 5
Ø (o loungour) flour : Pancaro entresigna
Flourido : Printems

Sòu : Ca
Autour basso e auto : Pancaro entresigna
Aparado : Noun

Liò : Garrigo
Estànci : Termoumediterran à Mountagnard
Couroulougi : Pancaro entresigna
Ref. sc. : Rhamnus alaternus L., 1753

Erbo-di-rascas

Plumbago europaea

Plumbaginaceae

Àutri noum : Erbo-enrabiado, Bagoun, Erbo-de-la-rougno, Erbo-di-couquin, Malo-erbo.

Noms en français : Dentelaire, Malherbe.

Descripcioun :
L'erbo-di-racas, mens coumuno qu'à passa tèms, trachis en ribo de camin, i pèd de muraio e dins lis escoumbre ounte flouris amé de poulìdi flour vióuleto, à la fin de l'estiéu. Es uno planto eisado de recounèisse emé si flour e si fru pegous qu'arrapon li péu e li teissu.

Usanço :
Èi couneigudo au nostre pèr garris la rasco. Ramentèn qu'aquesto malautié de pèu e de péu s'aprèn à de champignoun coume Microsporum canis. Freta la bèsti emé d'òli de bagoun (adouba en fasèn bouli la planto dins l'òli). Se dis peréu qu'en mastegant la racino, apaisso li ràbi de dènt (erbo-enrabiado)-TdF. Pamens se n'en fau mesfissa que fretado sus la pèu pòu douna d'enflamacioun.